BREAKING NEWS

Ads

உலகம்

Wednesday, 24 September 2014

மின்சார துறையில் ரூ.6,854 கோடி பற்றாக்குறை


மின்சார துறையில் ஏற்பட்டுள்ள ரூ.6,854 கோடி பற்றாக்குறையை சமாளிப்பதற்காக, மின்சார கட்டணத்தை உயர்த்த தமிழ்நாடு மின்சார ஒழுங்குமுறை ஆணையம் திட்டமிட்டுள்ளது. இதுகுறித்து தமிழ்நாடு மின்சார ஒழுங்குமுறை ஆணைய அதிகாரிகள் கூறியதாவது:-

மின்சார கட்டணம் நிர்ணயம்


நிதி மறுசீரமைப்பு திட்டத்தின் தேவைக்கேற்ப, மின்கட்டண வீதத்தினை ஒவ்வொரு ஆண்டும், ஆண்டு வருவாய்த் தேவையை பூர்த்தி செய்யும் நோக்கில் மறுநிர்ணயம் செய்ய வேண்டும்.

இந்தசூழ்நிலையில், தமிழ்நாடு மின்சார ஒழுங்குமுறை ஆணையம் 2014-2015-ம் ஆண்டுக்கு மின்கட்டண வீதத்தினை மற்றும் ஆண்டு வருவாய்த் தேவையினை, தமிழ்நாடு மின்உற்பத்தி மற்றும் பகிர்மானக் கழகம் ஆணையத்திற்கு சமர்ப்பித்த தகவல்களின் அடிப்படையில் நிர்ணயம் செய்துள்ளது.

ரூ.6,854 கோடி பற்றாக்குறை

ஒழுங்குமுறை ஆணையத்திடம் உள்ள தகவல்களின் அடிப்படையில் மொத்த வருவாய் தேவையாக ரூ.39 ஆயிரத்து 818 கோடி என நிர்ணயம் செய்யப்பட்டுள்ளது. அதேபோல் 2014-2015-ம் நிதி ஆண்டுக்கான வருவாயாக ரூ.32 ஆயிரத்து 964 கோடி என தற்போது உள்ள மின்கட்டண வீதத்தின் அடிப்படையில் நிர்ணயம் செய்துள்ளது.

2014-2015-ம் நிதி ஆண்டுக்கு வருவாய் பற்றாக்குறையாக ரூ.6,854 கோடி என நிர்ணயம் செய்யப்பட்டுள்ளது. இந்த பற்றாக்குறையை சரிசெய்யும் நோக்கில் பிரிவு வாரியாக அனைத்து மின்நுகர்வோருக்கும் மின்கட்டண வீதத்தினை உயர்த்த ஆணையம் முடிவெடுத்துள்ளது. மின்கட்டணம் உயர்த்தப்பட்டு ரூ.6,854 கோடி வருவாய் வந்தாலும், திருத்தப்பட்ட வருவாய் பற்றாக்குறை ரூ.49 கோடி ஏற்படும்.

வீடுகளுக்கு 40 காசு உயர்வு

அந்தவகையில் வீடுகளுக்கு 2 மாதத்திற்கு 50 முதல் 100 யூனிட்டுக்கு ஒரு யூனிட் ரூ.2.60 லிருந்து ரூ.3 ஆகவும், 200 யூனிட்டுக்கு ரூ.2.80 லிருந்து ரூ.3.25ம், 201 யூனிட் முதல் 500 யூனிட் வரை பயன்படுத்துவோருக்கு ரூ.4 லிருந்து ரூ.4.60ம், சராசரியாக 501 யூனிட்டும் அதற்கு மேலும் பயன்படுத்தினால் ஒரு யூனிட் ரூ.5.75 லிருந்து ரூ.6.60 என்ற கட்டணம் உயர்த்தப்பட உள்ளது. அதன்படி வீடுகளுக்கு முதல் 100 யூனிட் பயன்படுத்துவதாக இருந்தால் ஒரு யூனிட் 40 காசு வீதம் உயர உள்ளது.

உயர் அழுத்த நுகர்வோர்களுக்கான மின்கட்டணம் 2014-2015-ம் ஆண்டுக்கான தொகை விவரம் வருமாறு:- ஒரு கிலோ வாட்டுக்கான தொகை தொழிற்சாலைகளுக்கு ரூ.300 லிருந்து ரூ.350 ஆகவும், ரெயில்வே துறைக்கு ரூ.250 லிருந்து 300 ஆகவும், அரசு மற்றும் உதவி பெறும் கல்வி நிறுவனங்களுக்கு ரூ.300 லிருந்து 350 ஆகவும், தனியார் கல்வி நிறுவனங்களுக்கு ரூ.300 லிருந்து ரூ.350 ஆகவும், வணிக நிறுவனங்களுக்கு ரூ.300லிருந்து ரூ.350 ஆகவும், தற்காலிக வினியோகத்துக்கு ரூ.300 லிருந்து ரூ.350 ஆகவும் உயர்த்த உத்தேசிக்கப்பட்டுள்ளது.

குடிசைகளுக்கு மானியம்

குடிசைகளுக்கு 2 மாதங்களுக்கு அரசு மானியமாக ரூ.250 வழங்குகிறது. மின்கட்டணம் உயர்த்தப்பட்டால் அரசு ரூ.290 ஆக உயர்த்தி வழங்கும். பொதுவழிப்பாட்டுத் தலங்களுக்கு 2 மாதத்திற்கு 120 யூனிட் வரை பயன்படுத்தினாலும், அதற்கு மேல் பயன்படுத்தினாலும் கிலோ வாட்டுக்கு ரூ.100 லிருந்து ரூ.120 ஆக நிலையான கட்டணம் உயர்த்தப்படுகிறது. மின்திறன் கட்டணம் ஒரு யூனிட்டுக்கு ரூ. 5 லிருந்து ரூ.5.75 ஆக உயர்த்தப்படுகிறது.

2 மாதத்திற்கு 500 யூனிட் வரை பயன்படுத்தும் குறுந்தொழில்களுக்கு கிலோ வாட்டுக்கு நிலையான கட்டணம் ரூ.30 லிருந்து ரூ.50 ஆக உயர்த்தப்படுகிறது. 500 யூனிட் வரை பயன்படுத்தினால் யூனிட்டுக்கு மின்கட்டணம் ரூ.3.50 லிருந்து ரூ.4 ஆக உயர்த்தப்படுகிறது.

ஆணையம் பரிந்துரை


501 யூனிட்டுக்கு மேல் பயன்படுத்தினால் மின்திறன் கட்டணம் ரூ.4 லிருந்து ரூ.4.60 ஆக உயர்த்தப்படுகிறது. தொழிற்சாலைகளுக்கு நிலையான கட்டணம் கிலோ வாட்டுக்கு ரூ.60 லிருந்து ரூ.70 ஆக உயர்த்தப்படுகிறது. மின்திறன் கட்டணம் ஒரு யூனிட்டுக்கு ரூ.5.50 லிருந்து ரூ.7.22 ஆக உயர்த்தப்படுகிறது. 2 மாதத்திற்கு 100 யூனிட் அல்லது அதற்கு மேல் பயன்படுத்தும் வணிக நிறுவனங்களுக்கு கிலோ வாட்டுக்கு ரூ.120 ஆக உள்ள நிலையான கட்டணம் ரூ.140 ஆக உயர்த்தப்படுகிறது. 100 யூனிட் வரை பயன்படுத்தினால் மின்திறன் கட்டணம் யூனிட்டுக்கு ரூ.4.30 லிருந்து ரூ.4.95 ஆக உயர்த்தப்படுகிறது.

100 யூனிட்டுக்கு மேல் பயன்படுத்தினால் மின்திறன் கட்டணம் ஒரு யூனிட்டுக்கு ரூ.7 லிருந்து ரூ.8.05 ஆக உயருகிறது. தற்காலிக செயல்பாடுகளுக்காக வழங்கப்படும் மின்சாரத்திற்கு மாதம் ஒன்றுக்கு கிலோ வாட்டுக்கு வசூலிக்கப்படும். நிலையான கட்டணம் ரூ.300 லிருந்து ரூ.345 ஆக உயர்த்தப்படுகிறது. மின்திறன் கட்டணம் யூனிட்டுக்கு ரூ.10.50 லிருந்து ரூ.12.10 ஆக உயர்த்தப்படுகிறது. 2 மாதத்திற்கு 500 யூனிட் வரை நுகர்வோருக்கு கிலோ வாட்டுக்கு ரூ.100 ஆக உள்ள நிலையான கட்டணம் ரூ.120 ஆக உயர்த்தப்படுகிறது. மின்திறன் கட்டணம் யூனிட்டுக்கு ரு.4.50 லிருந்து ரூ.5.20 ஆக உயர்த்தப்படுகிறது. தமிழ்நாடு மின்சார ஒழுங்குமுறை ஆணையம் பரிந்துரை செய்துள்ளது.

ஆட்சேபனை


இதுபற்றிய கருத்துரைகளை தாக்கல் செய்ய விரும்பும் நபர்கள், அவரது கருத்துரைகளை, செயலாளர், தமிழ்நாடு மின்சார ஒழுங்குமுறை ஆணையம், எண் 19-ஏ, ருக்மினி லட்சுமிபதி சாலை, எழும்பூர், சென்னை-8 என்ற முகவரிக்கு வரும் அக்டோபர் 23-ந்தேதி அன்றோ அல்லது அதற்கு முன்போ நேரிலோ அல்லது அஞ்சல் மூலமாகவோ தாக்கல் செய்யலாம்.

இந்த மதிப்புரைகளை ஆய்வு செய்த பின்பு, ஆணையத்தினால் தீர்மானிக்கப்படும் மதிப்புரையாளர்களை ஆணையத்தினால் அறிவிக்கப்படும் நாட்களில் நடைபெறும் பொதுமக்கள் கருத்துக் கேட்புக் கூட்டத்துக்கு அழைக்கப்படுவார்கள். கருத்து கூட்டத்தின் அடிப்படையில் உரிய முடிவுகள் எடுக்கப்பட உள்ளன.

இவ்வாறு அதிகாரிகள் கூறி உள்ளனர்.


Post a Comment

Comments disabled, Please use Facebook comment box

Note: only a member of this blog may post a comment.

 
Copyright © 2014 சற்றுமுன் செய்திகள்
Powered by:Purple Rain Media